BIGtheme.net http://bigtheme.net/ecommerce/opencart OpenCart Templates
Ana Yaprak / تاریخی گونلر / تورکمنچای موقاویله متنی

تورکمنچای موقاویله متنی

ترکمنچای موقاویله سی ، ۱۸۲۸جی ایل ۱۰ فئورال روسییا ایله ایران آراسیندا باغلانیب. بو موقاویله اساسیندا آذربایجان ایكی بولومه (گونئی آذربایجانقوزئی آذربایجان) بولونور.

تورکمنچای موقاویله متنی

بیرینجی مادده

بوتون روسییا ایمپئراتورو حضرت‌لری و ایران شاهی حضرت‌لری آراسیندا، اونلارین ورثه‌لری و تختتاجین واریث‌لری، اونلارین دؤولت‌لری و قارشیلیق‌لی صورت‌ده تبعه‌لری آراسیندا بوندان سونرا ابدی صولح، دوستلوق و تام راضی‌لیق اولاجاق‌دیر.

ایکینجی مادده

بوتون روسییا ایمپئراتورو حضرت‌لری و ایران شاهی حضرت‌لری حؤرمت‌له قبول ائدیرلر کی، راضی‌لیغا گلن یوکسک طرف‌لر آراسیندا باش وئرمیش و ایندی خوشبخت‌لیک‌دن قورتارمیش موحاریبه‌ایله گولوستان موقاویله‌سی‌نین قوووه‌سی اوزره قارشیلیق‌لی تعههودلر ده باشا چاتمیش‌دیر؛ اونلار گؤستریلن گولوستان موقاویله‌سی روسییا و ایران آراسیندا یاخین و اوزاق گلجه‌یه صولح و دوستلوق موناسیبت‌لری قورمالی و تصدیق ائتمه‌لی اولان ایندی‌کی شرط‌لر و قرارلارلا عوض ائتمه‌یی ضروری حساب ائتدی‌لر.

اوچونجو مادده

ایران شاهی حضرت‌لری اؤز آدیندان و اؤز ورثه‌لری و واریث‌لری آدیندان آرازین او تایی و بو تایی اوزره ایروان خانلیغی‌نی و ناخچیوان خانلیغی‌نی روسییا ایمپئرییاسی‌نین تام مولکییت‌ینه گوذشته گئدیر. شاه حضرت‌لری بو گوذشت نتیجه‌سی‌نده، حاضیرکی موقاویله‌نین ایمضالانماسیندان ساییلماق‌لا آلتی آی‌دان گئج اولمایاراق، یوخاری‌دا آدلاری چکیلن هر ایکی خان‌لارین ایداره ائدیلمه‌سینه عایید اولان بوتون آرخیولری و ایجتیماعی سندلری روسییا رییس‌لیگینه وئرمه‌یی وعد ائدیر.

دوردونجو مادده

موقاویله‌یه قوشولان یوکسک طرف‌لرین راضی‌لیغی ایله هر ایکی دؤولت آراسیندا سرحدلر آشاغیداکی حودوددا قرارا آلینیر:

سرحد خططی تورکیه تورپاق‌لاری‌نین اوجونداکی کیچیک آراراتانین زیروه‌سیندن آرالی‌دا دوز ایستیقامتده ان یاخین نؤقطه‌دن باشلایاراق او داغ‌لارین زیروه‌سیندن کئچیر؛ بورادان مایل‌لیک اوزره آراراتانین جنوب طرفیندن آخان آشاغی قاراسو چایی‌نین یوخاری‌لاری‌نا دوشور، سونرا سرحد خطی او چایین آخاری اوزره شرور قارشی‌سیندا اونون آرازا تؤکولدویو یئره‌دک داوام ائدیر؛ بو منطقه‌دن عابباس‌آباد قالاسی‌نادک آراز چایی‌نین یاتاغی اوزره گئدیر؛ بورادا قالانین آرازین ساغ ساحیلینده یئرلشن خاریجی ایستحکام‌لاری یانیندا یاریم آغاج، یعنی ۱۳ / ۲ روسییا وئرستی ائنینده بوتون ایستیقامت‌لرده دؤوره حاشییه‌لنه‌جک و او اطراف‌دا اولان تورپاق ساحه‌سی بوسبوتون محض روسییایا مخصوص اولاجاق‌دیر و بو گوندن ساییلماق‌لا ایکی آی عرضینده ان یوکسک دقیق‌لیک‌له آیریلاجاق‌دیر. سرحد خططی او یئردن، گؤستریلن دؤوره‌نین شرق طرف‌دن آرازین ساحیلی‌نه بیرلشدیگی یئردن باشلایاراق بیر داها او چایین یاتاغی‌ایله یئددی‌بولاق بره‌سینه‌دک گئدیر؛ بورادا ایران تورپاق‌لاری آراز چایی‌نین یاتاغی اوزره اوچ آغاجا، یعنی ۲۱ روسییا وئرستی اوزاناجاق‌دیر: سونرا سرحد موغان دوزو واسیطه‌سی‌له بولقارچایادک، ایکی کیچیجیک آدینابازار و ساریقامیش چای‌لاری‌نین بیرلشمه‌سینده اوچ آغاج یعنی ۲۱ روس وئرستی آشاغی‌دا اولان تورپاق‌لارا گئدیر؛ سرحد بورادان بولقارچایین سول ساحیلی‌ایله یوخاری؛ آدلاری چکیلن کیچیک آدینابازار و ساریقامیش چای‌لاری‌نین بیرلشمه‌سینه‌دک، سونرا شرقی آدینابازار چایی‌نین ساغ ساحیلی اوزره اونون یوخاری‌لارینادک داوام ائدیر، بورادان ایسه جیکویر یوکسک‌لیگی‌نین زیروه‌سینه‌دک ائله داوام ائدیر کی، او یوکسک‌لیک‌دن خزر دنیزی‌نه تؤکولن بوتون سولار روسییایا مخصوص اولاجاق‌دیر، ایران طرفه آخان بوتون سولار ایسه ایرانا مخصوص اولاجاق‌دیر. بورادا ایکی دؤولت آراسینداکی سرحد داغ زیروه‌لری‌له موعه‌ییه‌ن ائدیلیر؛ قرارلاشدیریلمیش‌دیر کی، اونلارین خزر دنیزینه دوغرو ائنیشی روسییایا مخصوص اولمالی‌دیر، او بیری یانداکی ائنیشی ایسه ایرانا مخصوص‌دور. سرحد جیکویر یوکسکلیگی زیروه‌سیندن، تالیشی رش دایره سیندن آییران داغ لار اوزره قمرکوهوم زیروه سینه دک کئچیر. سولارین آخارینی ایکی یئره بؤلن داغ لارین باشی، یوخاری دا آدینابازارین یوخاری آخاری و جیکویر زیروه‌سی آراسینداکی ساحه حاققیندا دئییلن کیمی، بورادا دا ائلجه سرحد حودودونو تشکیل ائده‌جک‌دیر. سونرا سرحد خططی سولارین آخارینا عایید یوخاری‌دا شرح اولونان قایدالارا آرامسیز عمل ائتمک‌له قمرکوهون زیروه‌سیندن زوواند و رش دایره‌لرینی آییران داغ سیلسیله‌سی اوزره وئلگیج دایره‌سی‌نین سرحدلرینه دک اوزاناجاق‌دیر. بئله‌لیک‌له، آدی چکیلن داغین زیروه‌سیندن عکس طرف‌ده یئرلشن حیصصه‌سی ایستیثنا اولماق‌لا زوواند دایره‌سی روسییایا بیرلشیر. هر ایکی دؤولت آراسینداکی سرحد خططی سو آخینی‌نین یوخاریدا قئید اولونان قایدالارینا دایما اویغون اولاراق، وئلکیج دایره‌سی سرحددیندن کلوپوتانین زیروه‌سی و وئلکیج دایره‌سینده کی داغ‌لارین باش سیلسیله‌سی اوزره آستارا چایی‌نین شیمال منبعیینه‌دک، بورادان او چایین یاتاغی بویو اونون خزر دنیزی‌نه تؤکولدویو یئره‌دک داوام ائده‌جک کی، بورادا دا روسییا تورپاق‌لارینی ایران‌دان آییرمالی اولان سرحد خططی قورتاریر.

بئشینجی مادده

ایران شاهی حضرت‌لری بوتون روسییا ایمپئراتورو حضرت‌لری‌نه اؤز صمیمی دوستلوغونا ثوبوت اولاراق، بو مادده ایله هم اؤز ورثه‌لری و ایران تختتاجی نین واریث‌لری آدیندان، یوخاری‌دا گؤستریلن سرحد خططی آراسیندا و قافقاز سیرا داغ‌لاری و خزر دنیزی آراسیندا یئرلشن بوتون تورپاق‌لارین و بوتون آدالارین، بونون‌لا برابر همین مملکت‌لرده یاشایان بوتون کؤچری و باشقا خالق‌لارین ابدی زامانه دک روسییا ایمپئرییاسینا مخصوص اولدوغونو طنطنه ایله تانیییر.

آلتینجی مادده

ایران شاهی حضرت‌لری هر ایکی دؤولت آراسیندا باش وئرمیش موحاریبه‌ایله روسییا ایمپئرییاسینا وورولموش خئیلی زیانا، همچینین روسییا تبعه‌لری نین دوچار اولدوغو قوربان‌لارا و ایتکییه حؤرمت علامتی اولاراق، اونلارین عوضینی پول تضمیناتی ایله اؤده‌مه‌یی عؤهده‌سینه گؤتورور. موقاویله‌یه قوشولان هر ایکی یوکسک طرف او موکافاتین مبلغینی اون کورور تومن رایجه و یا ایگیرمی میلیون گوموش مانات قرارلاشدیرمیش‌دیر، اونون واختی، اؤده‌نیش قایداسی و تامیناتی سؤزبه‌سؤز حاضیرکی تراکتاتا داخیل ائدیله بیله‌جک قوووه‌یه مالیک اولان خوصوصی موقاویله‌ده قرارلاشدیریلمیش‌دیر.

یئددینجی مادده

ایران شاهی حضرت‌لری اؤز اعلاءحضرت اوغلو شاهزاده عباس میرزا نین اؤز ورثه‌سی و تختتاجین واریثی تعیین ائتمک ایلتیفاتیندا بولونان کیمی، بوتون روسییا ایمپئراتورو حضرت‌لری اؤز دوستلوق موناسیبت‌لرینی و بو واریث‌لیک قایداسی نین تصدیقینه کؤمک ائتمک آرزوسونو آچیقآشکار ثوبوت ائتمک‌دن اؤترو بوندان سونرا شاهزاده عباس میرزا حضرت‌لری نین سیماسیندا ایران تاختتاجی‌نین ورثه‌سی و واریثی‌نی، اونون تاختا چیخماسیندان سونرا ایسه اونو او دؤولتین قانونی حؤکم‌داری حساب ائتمه‌یی عؤهده‌سینه گؤتورور.

سككیزینجی مادده

روسییانین تیجارت گمی‌لری، اوول‌کی قایدا اوزره، خزر دنیزی‌نده و اونون ساحیل‌لری بویونجا آزاد اوزمک و بونونلا برابر اونلارا یاخینلاشماق حوقوقونا مالیک‌دیر؛ گمی قضاسی حال‌لاریندا ایران‌دا اونلارا هر جور کؤمک ائدیلمه‌لی‌دیر. بو اوصول‌لا ایران تیجارت گمی‌لرینده ده خزر دنیزی‌نده اوول‌کی قایدا ایله اوزمک و روسییا ساحیل‌لرینه یان آلماق حوقوقو وئریلیر کی، اورادا گمی قضاسی حال‌لاریندا اونلارا قارشیلیق‌لی صورت‌ده هر جور کؤمک گؤستریلمه‌لی‌دیر. حربی گمی‌لره گلدیک‌ده ایسه، قدیم‌ده اولدوغو کیمی، یالنیز روسییا حربی بایراغی آلتیندا اولان حربی گمی‌لر خزر دنیزینده اوزه بیلرلر؛ بو سبب‌دن ده اوول‌کی موستثنا حوقوق ایندی‌ده اونلارا وئریلیر و تصدیق ائدیلیر کی، روسییادان باشقا هئچ بیر دؤولتین خزر دنیزینده حربی گمی‌لری اولا بیلمز.

دوققوزونجو مادده

بوتون روسییا ایمپئراتورو حضرت‌لری و ایران شاهی حضرت‌لری هر واسیطه‌ایله اونلار آراسیندا بو قدر خوشبخت‌لیک‌له برپا اولونموش صولح و دوستلوغو برقرار ائتمه‌یی آرزولایاراق، مووققت‌ی تاپشیریق‌لارین ایجراسی و یا داییمی قالماق اوچون بو و یا او بیری دؤولته گؤندریلن یوکسک سارای‌لارین (حؤکومت‌لرین) سفیرلری‌نین، ناظیرلری‌نین و ایش‌لر مووكکیل‌لری‌نین، اونلارین درجه‌سینه، راضی‌لیغا گلن یوکسک طرف‌لرین شرفینه، اونلاری بیرلشدیرن صمیمی دوست‌لوغا و یئرلی عادت‌لره اویغون اولاراق، احتیرام‌لا و (هر بیری‌نین) آیری‌لیق‌دا قبول ائدیلمه‌سینی قارشی‌لیق‌لی صورت‌ده روا بیلیرلر. خوصوصی پروتوکول ایله بو و یا او بیری طرفین عمل ائتمه‌سی اوچون بو مضمون‌دا مراسیم قرارلاشدیریلاجاق‌دیر.

اونونجو مادده

بوتون روسییا حضرت‌لری و ایران شاهی حضرت‌لری هر ایکی دؤولت آراسیندا تیجارت علاقه‌لری‌نین برپا اولونماسینی و گئنیشلنمه‌سینی صولح‌ون برقرار اولماسی‌نین ان باشلیجا خئییرخواه نتیجه‌لری‌ندن بیری سایدیق‌لاری اوچون، تام قارشی‌لیق‌لی راضی‌لیق اساسیندا حؤکم وئردی‌لر کی، تیجارته حاکیم‌لیک ائدیلمه‌سینه و قارشی‌لیق‌لی صورت ده تبعه‌لرین تهلوکه سیزلیگینه عایید اولان بوتون سرانجام‌لار سعادت‌له یولونا قویولسون و اونلار اونو قارشی‌لیق‌لی صورت‌ده مووککیل‌لر طرفیندن باغلاناجاق بو صولح موقاویله‌سی نین عئینی گوج‌لو حیصصه‌سی ساییلمالی اولان و اونا علاوه ائدیلن آیریجا آکت ایله ایضاح ائتسین‌لر. ایران شاهی حضرت‌لری، قاباق‌لار اولدوغو کیمی، روسییایا تیجارتین خئیرینه طلب اولونان هر یئره کونسول‌لار و تیجارت آژئنت‌لری تعیین ائتمک حوقوقو وئریر و عؤهده‌سینه گؤتورور کی، هر ایکی‌سی‌نین میتی اون نفردن چوخ اولمایاجاق کونسول و آژئنت‌لره هامی‌لیک گؤسترسین کی، اونلار اؤز روتبه‌لرینه وئریلمیش شانشؤوکت و اوستون‌لوک‌لردن ایستیفاده ائتسین‌لر. بوتون روسییا ایمپئراتورو حضرت‌لری اؤز طرفیندن ایران شاهی حضرت‌لری نین کونسول و یا تیجارت آژئنت‌لری‌نه موناسیبت‌ده بونا تام مووافیق عمل ائدیلمه‌سینه وعد وئریر. ایران حؤکومتی‌نین روسییا آژئنتینه و یا کونسولونا اساس‌لی شیکایتی اولارسا، روسییا ناظیری (سفیری) و یا اونون شاه حضرت‌لری سارایی یانیندا ایش‌لر مووککیل‌ی، یادا اونلارین بیلاواسیطه رییسی اؤز مولاحیظه‌سینه اساسن گوناه‌کاری وظیفه‌سیندن اوزاقلاشدیرا و اونو مووققت‌ی اولاراق دیگر شخصه حواله ائده بیلر.

اون‌بیرینجی مادده

قارشی‌لیق‌لی صورت‌ده تبعه‌لرین بوتون طلب‌لری و موحاریبه‌ایله دایاندیریلمیش باشقا ایش‌لر صولح باغلاندیق‌دان سونرا عدالت‌له برپا اولوناجاق و حلل ائدیله‌جک‌دیر. قارشی‌لیق‌لی صورت‌ده تبعه‌لرین اؤز آرالاریندا بو و یا او بیری حؤکومتین خزینه‌سینه موقاویله تعههودلری درحال و تامامی‌له تامین ائدیلمه‌لی‌دیر.

اون‌ایكینجی مادده

باریشیغا گلن یوکسک طرف‌لر تبعه‌لرین خئیری اوچون اؤزلری‌نین عومومی راضی‌لیغی اوزره قارشی‌لیق‌لی صورت‌ده قرارا آلمیش‌دیر: اونلاردان آرازین هر ایکی طرفینده ترپنمز املاکا مالیک اولانلاری‌نا اوچ ایل واخت وئریلمه‌لی‌دیر کی، اونلار بو موددت عرضینده اونو آزاد صورت‌ده ساتسین‌لار و ده‌ییشسین‌لر. لاکین بوتون روسییا ایمپئراتورو حضرت‌لری اونا عایید اولدوغونا گؤره، کئچمیش ایروان سرداری حوسئین خانی، اونون قارداشی حسن خانی و کئچمیش ناخچیوان حاکیمی کریم خانی بو ایلتیفات‌لی سرانجام‌دان کانار ائدیر.

اون‌اوچونجو مادده

آخیرینجی و یا بوندان قاباق‌کی موحاریبه‌نین گئدیشینده اسیر آلینمیش هر ایکی طرفین بوتون حربی اسیرلری، بونونلا برابر هر ایکی حؤکومتین نه واختسا اسیر دوشموش تبعه لری قارشی‌لیق‌لی صورت‌ده آزاد ائدیلمه‌لی و دؤرد آی عرضینده قایتاریلمالی‌دیر؛ اونلار حیاتی آذوقه و دیگر طلبات‌لارلا تامین ائدیلمه‌لی و اونلاری قبول ائتمک و سونراکی یاشاییش یئرینه یوللاماغا سرانجام وئرمک اوچون هر ایکی طرف‌دن آیریلمیش کومیسسارلارا وئرمک‌دن اؤترو عابباس‌آبادا گؤندریلمه‌لی‌دیرلر. راضی‌لیغا گلن یوکسک طرف‌لر هر ایکی طرف‌دن اسیر دوشموش، لاکین اولدوق‌لاری یئرین اوزاق لیغینا و یا باشقا بیر سببه و یا وضعیته گؤره گؤستریلن موددته قایتاریلا بیلمه‌یه‌جک بوتون حربی اسیرلره، هابئله روسییا و ایران تبعه‌لرینه‌ده بو یول‌لا یاناشاجاق‌لار. هر ایکی دؤولت بئله‌لری‌نین هر بیر واخت طلب ائدیلمه‌سینده اؤزونه دقیق و غئیریمحدود حوقوق وئریر و عؤهده‌سینه گؤتورور کی، اونلار آشکار ائدیلدیک‌ده و یا اونلار حاققیندا طلب‌لر آلیندیقدا قارشی‌لیق‌لی صورت‌ده اونلاری (بیربیرین) قایتارسین‌لار.

اون‌دوردونجو مادده

راضی‌لیغا گلن یوکسک طرف‌لردن هئچ بیری آخیرینجی موحاریبه‌نین باشلانماسینادک و یا او واختی دیگری نین تبعه‌لیگینه کئچمیش اولان ساتقین‌لارین و فراری‌لرین وئریلمه‌سی‌نی طلب ائتمه‌یه‌جک‌دیر. ایران حؤکومتی بو قاچقین‌لاردان بعضی‌لری‌نین و اونلارین کؤهنه هم‌وطن‌لری‌نین و یا حاکیمیتی آلتیندا اولان‌لارین آراسیندا غرض‌لی علاقه‌لردن قارشی‌لیق‌لی صورت‌ده باش وئره‌بیله‌جک ضررلی نتیجه‌لرین قارشیسینی آلماق اوچون، عؤهده‌سینه گؤتورور کی، ایندی و یا سونرالار روسییا حؤکومتی نین آدبااد گؤستردیگی آدام‌لارین آرازلا چارا چایی‌نین، اورمییا گؤلونون، جاکاتو چایی‌نین و قیزیل اوزن چایی‌نین خزر دنیزینه تؤکولدویو یئر آراسیندا یاراتدیغی حودودداکی اؤز تورپاق‌لاریندا اولماسینی قاداغان ائده‌جک‌دیر. بوتون روسییا ایمپئراتورو حضرت‌لری اؤز طرفیندن ایران قاچقین‌لاری نین قاراباغ و ناخچیوان خانلیق‌لاریندا و ایروان خانلیغی‌نین آراز چایی‌نین ساغ ساحیلینده یئرلشن حیصصه‌سینده یورد سالماسینا و یا یاشاماسینا (هر هانسی) بیر قراردا ایجازه وئرمه‌یه‌جه‌یی‌نی وعد ائدیر. لاکین اؤزلوگونده آیدین‌دیر کی، آنجاق رسمی روتبه داشییان و یا موعه‌ییه‌ن لیاقت صاحیبی اولان آدام‌لارا: شخصی نومونه‌لری، نصیحت و گیزلی علاقه‌لری ایله کئچمیش‌ده اونلارین ایداره‌سینده و یا حاکیمیتی آلتیندا اولان اوول‌کی هم‌وطن‌لرینه ضررلی تاثیر گؤستره بیلن خان، به‌ی و دینی رییس‌لر و یا موللالارا قارشی بو شرطین گوجو وار و اولاجاق‌دیر. عومومییت‌له، هر ایکی دؤولتین ساکین‌لرینه گلدیک‌ده ایسه، راضی‌لیغا گلن یوکسک طرف‌لر قرارا آلیر کی، هر ایکی طرفین بیر دؤولت‌دن او بیرینه کئچمیش و یا بون‌دان سونرا کئچه‌جک تبعه‌لری اونلارین کئچدیگی حؤکومتین ایجازه وئردیگی هر یئرده یورد سالا و یاشایا بیلر.

اون‌بئشینجی مادده

شاه حضرت‌لری اؤز دؤولتینه ساکیت‌لیگی قایتارماق و اؤز تبعه‌لریندن حاضیرکی موقاویله‌ایله بو قدر خوشبخت‌لیک‌له باشا چاتمیش موحاریبه‌ده تؤره‌دیلمیش بدبخت‌لیک‌لری داها دا آرتیرا بیلن هر شئیی کانار ائتمک کیمی خئییرلی، خیلاص‌ائدیجی نییت‌له حرکت ائده‌رک، آذربایجان آدلانان ویلایتین بوتون اهالی‌سینه و مأمورلارینا بوسبوتون و تام باغیشلانما عطا ائدیر. هانسی درجه‌یه مخصوص اولماسیندان آسیلی اولمایاراق، اونلاردان هئچ کس اؤز حرکتینه و یا موحاریبه عرضینده و یا روس اوردوسونون آدی چکیلن ویلایتی مووققت‌ی توتدوغو زامان داورانیشینا گؤره تعقیب‌ه، دینی عقیده‌سینه گؤره تحقیره معروض قالمامالی‌دیر. بوندان باشقا او مأمور و ساکین‌لره بو گون‌دن باشلایاراق اؤز عاییله‌سی ایله بیرلیک‌ده ایران ویلایتی‌ندن روسییایا سربست کئچمک، حؤکومت و یئرلی رییس‌لیگین هئچ بیر مانع‌چیلیگی اولمادان اونلارین ساتلیق مالینا و یا املاکینا و اشیالارینا هر هانسی گؤمروک و وئرگی قویولمادان ترپنن مولکییت‌ینی آپارماق و ساتماق اوچون بیر ایل واخت وئریلیر. ترپنمز مولکه گلدیک‌ده ایسه، اونون ساتیلماسی و یا اونون حاقیندا اؤزخوشونا سرانجام اوچون بئش ایل‌لیک موددت موعه‌ییه‌ن ائدیلیر. لاکین بو باغیشلانما قئید اولونان بیر ایل‌لیک مودت باشا چاتانادک محکمه جزاسی دوشن گوناه و یا جینایت ایشله‌میش آدام‌لارا شامیل ائدیلمیر.

اون‌آلتینجی مادده

مووککیل‌لر بو صولح موقاویله‌سی ایمضالاندیقدان سونرا، قارشی‌لیق‌لی صورت‌ده تاخیره سالینمادان تعجیلی اولاراق، حربی عملییات‌لارین کسیلمه‌سی حاققیندا بوتون یئرلره خبر و لازیمی فرمان گؤندرمه‌لی‌دیر. عئینی مضمون‌دا ایکی نوسخه‌ده ترتیب ائدیلمیش، هر ایکی طرفین مووککیل‌لری طرفیندن ایمضالانمیش، اونلارین گئرب‌لی مؤهورلری ایله تصدیق ائدیلمیش و قارشی‌لیق‌لی اولاراق بیربیرینه وئریلمیش بو صولح موقاویله‌سی بوتون روسییا ایمپئراتورو حضرت‌لری و ایران شاهی حضرت‌لری طرفیندن تصدیق و راتیفاکسییا ائدیلمه‌لی و اونلارین ایمضالادیغی راتیفیکاسییا متن‌لری طنطنه‌لی شکیل‌ده هر ایکی طرفین مووکكیل‌لری طرفینجدن دؤرد آی عرضینده و یا مومکون اولدوقجا داها تئز ده‌ییش‌دیریلمه‌لی‌دیر. فئورال آیی نین ۱۰دا عیسانین آنادان اولماسی نین ۱۸۲۸جی ایلینده تورکمنچای کندینده باغلانمیش‌دیر.

اصلینه قول چکمیش‌لر (امضالار): یوان پاسکوویچ، ا. اوبرئزکوو.