هم رای لیک گونو

آرازی آییردیلار  ، قومولا قاییردیلار  ،  من سیزدن آیرلمازدیم  ، زورولان آییردیلار

گوز یاشی توکر ائلیم ، تاریخی بوکر ائلیم ،  ۱٨٥ ـ ایل سونرا ،  سرحدی سوکر ائلیم

یادلار الی ایله میللتیمیز و وطنیمیز آذه ربایجانین پارچالانما تاریخینده ن  ۱٨٥ ایل کئچسه ده ، میللتیمیز بیرلی یه ، بوتوولویه اولان  اینامینی ایتیرمه میشدیر. آرازین هر ایکی تاییندا میللتیمیزین وئردیی موجادیله لر، قالدیردیغی قیاملر، یاراتدیقلاری حوکومتلرین ان نهایی هدفی پارچالانمیش میللت و وطنیمیزین بیرلشمه سی اولموشدور. تصادوفی دئییلدیرکی، ۱٩٩۱ ـ نجی ایلده قوزئی آذه ربایجانیمیزین تیکرار مستقیللی یی عرفه سینده، ایلک گورولن ایشلرده ن بیری سرحد حرکاتی اولموشدور. بو حرکت ده قوزئی لی و گونئی لی آذه ربایجانلی لار اورتاق حرکت ائتمیشلر. اوز اللریله ده میر  و آیریلیق دوواری نین سمبوللاری اولان تیکانلی مفتیل لری و سرحد دیره کلرینی  اودا چه کیب ، مین ساحه لرینی یوخ ائتمیشلر. اوزلرینی آرازین سرین سولارینا ووراراق  بیر ـ بیرلریله قوجاقلاشمیشلار.

آذه ربایجانیمیزین ۱٨٥ ایللیک آیریلیق تاریخینده،  بو سون حرکت،  میللتیمیزین  تمیزحس لرینی ، آرزولارینی ترنوم ائده ن ، بیرلیک و بوتوولویه اولان اینامی نین گوسترگه سی ایدی. بو دونیا ایجتماعییتی نین گوزلری قارشی سیندا حیاتا کئچیریلمیشدیر. باشقا سوزله دئسک یادلارین ـ اوزگه لرین  میللتیمیزی آییرما ، یادلاشدیرما چابالاری حاقدا اولان بوتون چابالاری نین یئرسیز اولدوغونو گوسترمیشدیر. میللتیمیز بونا اینانیرکی،  بیر گون  بو میللی بوتوولویه قووشاجاقدیر. بیر بوتوو میللت اولاراق دونیا ایجتماغییتینه اوزونو تقدیم ائده جکدیر. بوتون وارلیغیملا بونا اینانیرام ، بئله بیر میللتین بالاسی  اولدوغوما غرور دویورام. و بوگونو بوتون میللتیمیزه تبریک دئییره م .

یاشاسین اوزلویونو، میللی منلی یینی ایتیرمه ین ، وارلیغینا ، گله جه یینه اینانان میللتیمیز!