یاشاسین ۳۱ دئکابرآزربایجانلیلارین هم رای لیک گونو!

آزربایجان تورک میللتی، مین ایللر بویو تاریخی توپراقلاری اولان آزربایجان اراضی لرینده یاشامیش و یاشاماغادا دوام ائده جک.
چیخارجی دولت لر اؤز چیرکین پیلانلاری نتیجه سینده ، نه قده ر ساواش و حیله کارلیق ایله توپراقلاریمیزی بؤلوب و بیزی پارچا – پارچا ائتسه ده، هئچ بیرزامان وطن عشقین و حسرتین اوره کلریمیزدن سیله مه میش.
آرازین هر ایکی تایندادا میللتیمیزین وئردیی موجادیله لر، قالدیردیغی قیاملر، یاراتدیقلاری حوکومتلرین ان نهایی هدفی پارچالانمیش میللت و وطنیمیزین بیرلشمه سی اولموشدور.
محمد امین رسول زاده نین یاراتدیغی جمهورییت و قالدیردیغی بایراق، پیشه وری نین گونئی ده قوردوغو میللی حکومت، سوویت لرین چوکوشو ایله توپراقلاریمیزین قوزئی حیصه سینده یارانان آزربایجان جمهورییتی و اونون ایله آلولانان گونئی آزربایجاندا میللی حرکت و ایستیقلال مجادیله سی گؤستریرکی بو میللت بوتون باسقیلارا باخمیاراق نهایت بوتو آزربایجان دولتینی قوراجاقدیر.
تصادوفی دئییلدیرکی، ۱٩۸٩ ـ نجی ایلده سرحد حرکاتی باشلانیر. و میللتیمیز اللریله ده میر و آیریلیق دوواری نین سمبوللاری اولان تیکانلی مفتیل لری و سرحد دیره کلرینی اودا چه کیب و اؤزلرینی آرازین سرین سولارینا ووراراق بیر ـ بیرلرایله قوجاقلاشیرلار.
۱۹۹۱نجی ایلین ۱۶دئکابرینده آلینان قرار ایله ۳۱ دئکابر دونیا آزربایجانلیلارینین هم رأی لیک گونو اعلان اولونموش. و هر ایل دونیانین بیر چوخ یئرینده و اؤزللیک ایله ایشغال آلتیندا ، اؤزگورلوک مجادیله سی وئره ن گونئی آزربایجانیمیزدا بایرام کیمی قوتلانیلیر .
۳۱ دئکابر دونیا آزربایجانلیلارینین هم رأی لیک گونو ،اؤزللیک ایله گونئی آزربایجاتن میللی حرکتینده فداکارجاسینا چالیشان قهرمانلاریمیزا استراتژی لرینین آماج و مقصدینی گوسته ردیگی اوچون چوخ اونم داشیماقدادیر.
ایرقچی – ایشغالچی رئژیم ، ماهیتی و یوروتدوغو ارتیجاعی دوشونجه ایله سیاسی ، ایقتصادی و کولتورل پروژه لر نتیجه سینده میللتلرین نفرتین و بین الملل صحنه ده دیشلانمایی قازانمیش.
آرخا- آرخایا گلن اجتماعی اعتراضلار و بین الملل تحریملر و اؤزللیک ایله فارس میللتینین ده آیاخلانماسی غیر فارس میللتلره قورتولوش اوچون بویوک فرصت یاراتمیش.
امید ائدیریک بو تاریخی فرصتی دوغرو قوللاناراق بیر یاندان ایشغالچی رئژیمین حاکمییتینه سون وئریرکن، حاضیرلانمیش فارس آلترناتیولرین توزاغینا دوشمه یب و میللی ایستک و داوامیزی ایرانچیلیق و ساده جه حاکمیت دئیشمه سینه فدا ائتمییک.
اونوتمایالیم اعتراضلارا قاتیلماق اؤز ایستک و استراتژیمیزین اساسیندا اولمالی و ایرانچی شعارلار و اونا اویان مانقوردلارایله بیرلیکده حرکت ائتمک آنلامینا گلمه مه لی.
شبهه سیز میللتیمیزین ایستک و آرزولاری بیر گون قهرمان اولادلارینین اوزگورلوک مجادیله سی ایله گئرچکله شه جک.

یاشاسین اوزلویونو، میللی منلی یینی ایتیرمه ین ، وارلیغینا ، گله جه یینه اینانان میللتیمیز!
یاشاسین قورتولوش اوچون مجادیله ده قهرمانجاسینا دوشمانین دوسداقلاریندا میللتین و توپراقلارین ساوونان ایگیت لره
یاشاسین اونودولماز شهید لریمیزین شانلی اوزگورلوک یوللاری!.
گونئی آزربایجان میللی یول تشکیلاتی
۲۹.۱۲.۲۰۱۹
۰۸.۱۰.۱۳۹۸