BIGtheme.net http://bigtheme.net/ecommerce/opencart OpenCart Templates
Ana Yaprak / Slideshows_ / دونیا آنا دیلی گونو مناسیبتی ایله ایستقلالچی تشکیلاتلار بیرلیگی نین بیلدیریسی

دونیا آنا دیلی گونو مناسیبتی ایله ایستقلالچی تشکیلاتلار بیرلیگی نین بیلدیریسی

انسانین دونیایا گوز آچارکن اؤیره ندیگی دیل آنا دیلی دیر. آنا ديلی فردين دوغومو ایله بیرلیکده قازانديغي بیرحاقدير. ديل اينسانا شخصيت، میللی کیملیک، اؤره نمک، دوشونمک و داها دوغروسو ماهیت قازاندیریر.

ديل اينسان حياتيندا چوخ اهميتلي يئره مالیک اولدوغو اوچون بین الخالق حقوق و کنوانسیالاردا، اوزللیکله ۱۹۴۸-نجی ایلده اينسان حاقلاري کونوانسیونوندا واز کئچیلمز بیر حاق اولاراق تثبیت ائدیلمیشدیر.

ايران آدلانان راسيست دؤولتين ترسينه چاغداش دونيا، اؤزللیکله آوروپا چوخ کولتورلولوگو زنگينليک کیمی قييمت لنديریر و اؤز سرحدلري ايچريسينده ياشايان آزلیقلارا ديل مؤضوعسوندا هر هانسي تزييق تطبيق ائتمیر. عکسینه اونلارا اؤز ديل و مدنيتلريني اؤيرنمک ايمکاني تانيميشدير. بوگون آوروپا اؤلکه‌لرينين بير چوخوندا بيردن چوخ ديلده تحصيل مؤوجوددور.

بين الخالق حقوق باخيميندان، اينسانين اؤز ديلينده دانيشماسي، يازماسي، اؤزونو ايفاده ائتمه‌سي، بير طبیعی حاقدير. ايران آدلانان یئرده ياشايان غیر فارس میللت لر(تورک، تورکمن، کورد، بلوچ، عرب، لور، گيلک و …) يعني اؤلکه‌نين چوخونلوغو اؤز دوغما ديللرينده تحصيل آلماقدان محروم قالميشدیر . آنا ديلینده تحصيل و چوخ ديللي حيات طبيعي، مقدس، ائله جه ده کونستيتوسيون بير حاقدير.

ديل جانلي بير وارليق اولاراق، ايستيفاده ائديلديگينده اينکيشافيني داوام ائتديرديگي کيمي ايستيفاده ائديلمه‌ديگي زامان دا يوخ اولماغا محکومدور. اشغالچی راسیست فارس حاکمیتی ايللردير رسمي دولت پولوتيکاسي کیمی بیلینجلی بیر شکیلده غیر فارس میللت لری یوخ ائتمک اوچون آنا دیلینده تحصیلی قاداغان ائتمیشدیر.

شبهه سیز و گئرچک آنلامدا آنا دیلین قورونماسی ساده جه اونون سیاسی جغرافیا و مستقیل دولت دیلی اولدوغو تقدیرده ممکوندور. بو گون نه قدر اسپانیا نسبی دئموکراتیک اؤلکه اولسا دا کاتالانلارین باغیمسیز اولمامالاری نتیجه سینده دیللری اسپانیا دیلینین ائتگی سی آلتیندادیر. سوویت لر بیرلیگینده سوزده جمهوریتلر اولسا دا باغیمسیز اولمادیقلاری اوچون نه قدر روس دیلینین ائتگیسینده اولدوقلاری معلومدور.

حال اؤز مقدّراتلارینی سوزده اللرینه الان نسبی دئموکراتیک اولکه لرده و سوویت لر کیمی یالانچی دولت لرده دوروم بئله دیرسه، ایشغالچی راسیست حاکمییتده کی غیر فارس میللت لرین دورومو معلومدور.

قهرمان آزربایجان تورک میللتی!

ایللردیرکی بوتون حاقلاریمیز تاپدالانمیش، یئر آلتی ثروت لریمیز تالان و طبیعتیمیز محو ائدیلمیشدیر، دیلیمیز یاساقلانمیش و اعتراضلاریمیزا قتل و زیندانلا جواب وئریلمیشدیر. آرتیق تک یول وار او دا قورتولوشدور.

بین الخالق آنا دیلی گونو یاخلاشیر و یئنه بیز ان دوغال حاقیمیزدان محروموق. نه ائتمه لییک؟ طبیعی کی، استراتژیک اولاراق قورتولوش مجادیله سی وئریلمه لییک. اما تاکتیک سل اولاراق آنا دیلی گونو ایله باشلایان اؤنوموزده کی گونلردهقارشیمیزدا دوران وظیفه لر :

۱- درنک لر یاراداراق آنا دیلیمیزی اؤیره نیب و گله جک قوشاقلاریمیزا اؤیره تمک؛

۲- فارس مئدیالارینی بایکوت ائدیب، میللی حرکاتین مئدیالاری و یا قوزئی آذربایجان و تورکیه مئدیالارینا یؤنلمک؛

۳- تورکجه کیتاب و قزئت لر الده ائتمک (تورکجه کیتاب آلیب اوخویوب و هدیه کیمی دوستلاریمیزا وئرمک، قزئت لره آبونه اولوب پایلانماسینا یاردیمجی اولماق)؛

۴- گونئی آذربایجاندا دیوارلارا میللی ایستک لرینیزی یازماقلا حقوقلاریمیزین طلبینین عمومیلشمه سینه یاردیم ائتمک؛

۵-هر نوع اجتماعی اعتراضلارا قاتیلاراق میللی ایستک لریمیزی دیله گئتیرمکله، مغلوب راسیست لرین پیلانلارینی پوزماق؛

۶- داها سیستماتیک و جدی مبارزه اوچون میللی تشکیلات لارا قاتیلماق .

هئچ شبهه سیز گله جک بیزیمدیر.

رد اولسون ایشغالچی ایران فارس رئژیمی!

وار اولسون موستقیل گونئی آزربایحان!

گونئی آزربایجان ایستقلالچی تشکیلاتلار بیرلیگی